Elephant Rest, gelee teenaan die pragtige Lawnwood inheemse bos, bied 'n baie privaat, rustige wegbreekgeleentheid. Beleef die vrede en prag van die natuur, verskeidenheid voelsoorte, bergfietsroetes, watervalle en riviere om op kano's te verken! Ons is slegs 20 minute weg van pragtige en veilige swemstrande waar branderplankryers en swemmers hul kan uitlewe!

Elephant Rest is naby die Homtini bergfietsroete met sy ongelooflike vistas oor die asemrowende Outeniquaberge. Afhangende van die seisoen, is daar pragtige fynbos en proteas om die oe te betower! En dan is daar ook die laaste paar Knysna olifante in die bos, asook ander wildsoorte soos bosbokke, bosvarke, bobbejane en sku luiperde!

Dis hier in die woud waar die bekende skrywer, Daleen Matthee, haar inspirasie vir haar boeke gekry het. Daar is 'n staproete vernoem na haar bekendste boek, nl "Kringe in die bos" en dit is baie naby Elephant Rest!
Een van ons plaaslike toergidse bied 'n begeleide toer aan met interessante inligting oor die area, sy bome en plante, mites en legendes en geskiedenis.

Op aanvraag bied ons Aromaterapie behandeling in die gemak van die woning asook gefasiliteerde joga sessies, terwyl die kleinspan hul kreatiwiteit kan uitoefen en hul eie t-hempies verf!!

Die uitleg van die huis is baie gerieflik met sy oopplan leefruimte. Die kombuis is ten volle toegerus met 'n mikrogolf, klein oond, groot yskas en vrieskas en al die nodige breekgoed en eetgerei, met genoeg spasie in die ruim kaste sowel as 'n klein spens.

Die hoofslaapkamer het sy eie stort en toilet, met 'n dubbelbed en deure wat oopmaak op die houtbalkon met lieflike uitsig oor die dam en nabygelee plase. Die tweede slaapkamer het ook 'n dubbelbed en deure wat op die balkon oopmaak. Die derde slaapkamer het twee enkelbeddens, en dan is daar natuurlik ook 'n tweede badkamer met 'n bad, wasbak en toilet. Al die slaapkamers het groot ingeboude kaste.

Elephant Rest is rolstoel vriendelik met maklike toegang vanuit die binne leefarea na die beskutte balkon.

Daar is 'n buite vuurmaakplek om te braai en gesellig te verkeer asook 'n kaggel binne vir die koeler weer. Hout is te koop.

Elephant Rest is ideaal vir famiie byeenkomste en daar is genoeg kuier ruimte om binne of buite gesellig saam te verkeer. Hier kan mens die gejaagdheid van die stad ontsnap en die lieflike sonsondergange aanskou na 'n dag vol avontuur of rustige verkeer in die natuur.

Ons sien uit om julle hier in ons unieke stukkie paradys te verwelkom waar die paddasang onder die sterrehemel saans betower!