Chateau Anri La Mer is ‘n selfsorg vakansie huis aan die oewers van die Swartvleimeer by die pragtige dorpie Sedgefield in die hartjie van die Tuinroete.

Sedgefield het drie lieflike Strande en bied ook veilige swem by die mond van die meer waar dit in die see vloei. Dit is geleë tussen Wildernis en Knysna en daar is ‘n groot verskeidenheid besienswaardighede en aktiwiteite in die omgewing.

Chateau Anri La Mer het vyfslaapkamers en kan tot elf persone akkommodeer. Daar is drie volledige badkamers waarvan een en-suite aan die hoofslaapkamer is. Al die slaapkamers is op die eerstevloer met uitstekende uitsig oor die Swartvleimeer. Hierdie groot huis het al die moderne toebehore insluitend wasmasjien, tuimeldroer, skottelgoedwasser, vrieskas en yskas.

Die huis is ingerig as ons eie vakansiehuis en is daarom toegerus as ‘n baie gerieflike tuiste weg van die huis.

Op die eerstevloer is ‘n daar ‘n groot sitkamer met platskerm televisie en volle DSTV. Op die grondvloer is daar ‘n tweede sitkamer/speelkamer, ‘n eetkamer en ‘n groot gerieflike kombuis. Die ruim huis is ideal vir gerieflike samesyn, selfs op daardie min en uitsonderlike slegteweer dae in die jaar. Die lugverkoeler hou die hele huis verfrissend op daardie warm somersdae.

Geniet rustig sonsondergang oor die Swartvleimeer met skemerkelkies vanaf die ruim balkon.

Die groot grasperk buite sal aktiewe lede besig hou as hulle nie by die strand is nie. In die motorhuis is ‘n stewige twee person kano wat gebruik kan word om op die meer te roei.

Die huis is wel groot, maar veral buiteseisoen is dit ook ‘n besondere verblyf vir slegs ‘n wittebroodpaartjie.